விஜய்யின் தவெக மாநாடு தொடங்கி, தியேட்டர்கள், மெட்ரோ ரயில்கள், அரசியல் கட்சி தலைவர்களின் பொதுக் கூட்டம் என மக்கள் அதிகம் கூடும் பொது இடங்களில் ‘கடவுளே அஜித்தே’ என்ற கரகோஷம் எழுப்பி, அதை இணையத்தில் டிரெண்ட் செய்வதை அஜித் ரசிகர்கள் வழக்கமாக்கி வருகின்றனர். இந்த உலகளவில் பிரபலமான இந்த ‘கடவுளே அஜித்தே’ என்ற டிரெண்டு முதன் முதலில் பரோட்டா கடை ஒன்றில் தான் தொடங்கியது. அதாவது, பரோட்டோ கடை ஒன்றில் மாஸ்டர் கொத்து பரோட்டா போடும்போது, அந்த சத்தத்திற்கு ஏற்றபடி அங்கிருந்த அஜித் ரசிகர்கள் ‘அஜித்தே.. அஜித்தே..’ என கோஷமிட்டுள்ளனர்.
அது வீடியோவாக வெளியாகி இணையத்தில் செம்ம வைரலாகிவிட்டது. அதையடுத்து, அஜித் ரசிகர்கள் பலரும் இதுபோன்று கோஷமிட்டு சமூக வலைதளங்களில் பதிவிட ஆரம்பித்தனர். அந்த வீடியோக்களுக்கும் எக்கச்சக்கமான லைக்குகள் குவிந்து வர, அது டிரெண்டாகவே மாறிவிட்டது. ஆனால், ரசிகர்களின் சேட்டையை பார்த்த அஜித் இதுபோன்ற கோஷங்கள் எனக்கு கவலை அளிப்பதாக ஏற்கனவே தெரிவித்திருந்தார். ‘தல’ என்ற அடைமொழியே விரும்பாத அஜித், தற்போது இது குறித்த அறிக்கை ஒன்றை வெளியிட்டிருக்கிறார்.
அந்த அறிக்கையில், “சமீபகாலமாக முக்கியமான நிகழ்வுகளில், பொதுவெளியில், அநாகரீகமாக, தேவையில்லாமல் எழுப்பப்படும் ‘க… அஜித்தே’ என்று இந்த கோஷம் என்னை கவலையடைய செய்திருக்கிறது. எனது பெயரை தவிர்த்து என் பெயருடன் வேறு எந்த முன்னொட்டும் சேர்த்து அழைக்கப்படுவதில் எனக்கு துளியும் உடன்படவில்லை. எனது பெயரில் மட்டுமே நான் அழைக்கப்பட வேண்டும் என விரும்புகிறேன்.
எனவே பொது இடங்களில் மக்கள் அதிகம் கூடும் இடங்களிலும் அசெளகர்யத்தை ஏற்படுத்தும் இந்த செயலை நிறுத்துவதற்கு உங்களை ஒத்துழைப்பை நான் அன்புடன் வேண்டுகிறேன். என்னுடைய இந்த கோரிக்கைக்கு உடனடியாக மதிப்பு கொடுப்பீர்கள் என்று நம்புகிறேன். மேலும், யாரையும் புண்படுத்தாமல் கடினமாக உழைத்து, உங்கள் குடும்பத்தை கவனித்துக் கொள்ளுங்கள் மற்றும் சட்டத்தை மதிக்கும் குடிமக்களாக இருங்கள். உங்களுக்கும் உங்கள் குடும்பத்தினருக்கும் அழகான வாழ்க்கை அமைய வாழ்த்துக்கள் என்றும்” அஜித் தனது ரசிகர்களுக்கு கோரிக்கை விடுத்துள்ளார்.
